KUALOA, HAWAIʻI
ʻO ananafi 5 Iune sā taunuʻu ai sā o le ʻĀiga Folau o le Pasefika i le gātaifale o le afioʻaga ʻo Kualoa i Hawaiʻi ʻauā le sāuni atu mo le tatala aloaʻia o le Faʻailoga o Tū ma Aga o le Pasefika lona 13 i le afiafi ʻānānei.
Na lolofi atu sui ʻeseʻese mai le 25 atumotu ma ona tupu o le Pasefika na ʻauai e talia ai le taunuʻu mai o vaʻa folau ma sui o mālō taʻitasi.
Ata Puʻeina (Sāmoana Media): Vaʻa folau na taunuʻu mai i Kualoa, Hawaiʻi
Sā ʻauai sui o ʻAmerika Sāmoa i luga o le vaʻa folau ʻo le Hōkūleʻa ʻae na atovaʻa mai sui o le ʻaumalaga.
ʻO se tasi lea faʻamoemoe sā fau ao fau pō e le Komiti o le FestPac ma ana pāʻaga ma ʻāiga folau o atunuʻu ʻesʻese mo le faʻamanatuina ai o le talaʻaga o tagata o le Pasefika ʻo ni tagata sā ʻaināina atu motu ʻuma o lenei vasaloloa e ala i le poto ma le atamai o tagata folau.
ʻO se faʻamoemoe foʻi lenei na ʻauai taʻtaʻi ma faʻauluuluga o mālō taʻitasi o le atu Pasefika. Na afifio ai le afioga a le Aliʻi Kovana o Hawaiʻi Josh Green ma le Pulenuʻu o Honolulu Rick Blangiardi e faʻaali ai lo lāʻua lagolago mālosi ʻi le tāua o le FestPac i le faʻatāuina o tū ma tū ma aganuʻu o le Pasefika, ʻaemaise i Hawaiʻi, ʻo le uluaʻi lea taimi ʻoloʻo talimālō ai e le mālō o Hawaiʻi lea faʻamoemoe tāua.
Ata Puʻeina (Sāmoana Media): Sui o ʻAmerika Sāmoa sā ʻauai i luga o le Hōkūleʻa
Ata Puʻeina (Sāmoana Media): Sui o ʻAmerika Sāmoa sā ʻauai i le sāuniga mulimuli mo le taliaina o sui o ʻauvaʻa
Ata Puʻeina (Sāmoana Media): Sui o Sāmoa sā ʻauai i le sāuniga mulimuli e tapunia ai le taliaina o ʻāiga vaʻa o le Pasefika
Sā taualugaina e le susuga a le aliʻi folau lauiloa ʻo Nāinoa Thompson le faʻamoemoe o le aso ma na ia momoli atu ma se faʻafetai i ʻāiga folau ʻeseʻese sā tapenina lenei faʻamoemoe ma malaga mai i nuʻu mamao.
ʻO le gātaifale foʻi lenei i Kualoa sā tuʻua ai le vaʻa folau lauiloa ʻo le Hōkūleʻa i lana malaga faʻataupou i le 1976 mo Tahiti ʻae ʻua silia ma le 40 tausaga talu ona tautua lenei vaʻa i le aʻotauina o alo ma tama fānau o le Pasefika i le tomai o tagata folau.
I le saunoaga a Nāinoa sā ia faʻatāuina ai le gālulue faʻatasi o tagata ʻuma Pasefika mo le agaʻi i luma i atinaʻe ʻeseʻese, e lē gata i le FestPac, a ʻo sāuniga ma faʻamoemoe ʻeseʻese ʻoloʻo ʻauai faʻatasi ai mālō ʻeseʻese o le Pasefika. ʻO se avanoa matagōfie foʻi lenei e faʻaleleia atili ai le vā o tagata Pasefika.
E tatala aloaʻia le Faʻaaliga o Tū ma Aganuʻu o Atu Motu o le Pasefika (FestPac) i le afiafi 6 Iuni ʻae tapunia i le aso 16 i le maota ʻo le Stan Sheriff i Honolulu.