‘O le pō anapoʻo na toʻai taunuʻu ai aliʻi tāʻaʻalo a ʻĪtālia i laufanua o Sāmoa ʻauā le taʻaloga muamua ma le ʻau lakapī a le atunuʻu.
E lua taʻaloga ʻoloʻo tapena ai le Manu Sāmoa, ʻo le taʻaloga ma ʻĪtalia i le aso ʻā taeao, ma le taʻaloga ma Sepania i le vāiaso ʻā sau a ʻo lātou sāuni atu mo le Ipu o le Pasefika e ʻāmata i le māsina fou.
E valu taʻaloga sā fetaui ai Sāmoa ma le ʻau a ʻĪtalia, a ʻo le taʻaloga talu ai i le 2023 sā manumālō ai ʻĪtālia i ʻai e 49-17. ʻOloʻo tūlaga valu nei ʻĪtālia i le faʻatūlagaina o ʻau lakapī o le lalolagi ʻae tūlaga 14 le Manu Sāmoa a ʻo loma nei le taʻaloga muamua.
‘Oloʻo ʻauai nei ma le ʻau malaga se tasi sui lauiloa o le ʻau a ʻĪtalia ʻo ia foʻi se tasi alo o Sāmoa le susuga a Montanna "Monty" Ioane ʻoleʻā fai ma uigi i le taʻaloga ma le Manu. ʻO Monty foʻi le ataliʻi o le uso o le tama taʻalo tuai taʻutaʻua a le ʻau a ʻAusetalia mo le tele o tausaga ʻua tuanaʻi, le susuga iā Digby Ioane.
ʻO le 5 i le afiafi ʻoleʻā fetōʻai ai le Manu Sāmoa ma le ʻau mālosi a ʻĪtalia i le Apia Park.